[ D3M-TeaM ]

 


ملحوظة : التسجيل الآن فى المنتدى مجاني سارع الان بالتسجيل

العودة   [ D3M-TeaM ] > دعم العامة > الـقـسـم الـعـام
الدعم الفني ارشفة مواضيع منتداك دليل المواقع - Dir


الملاحظات

الـقـسـم الـعـام للنقاش الهادف والبناء والمواضيع العامه


اعلانك هنا يحقق لك الشهرة والنجاح

إضافة رد
 
أدوات الموضوع انواع عرض الموضوع
  #1  
قديم 2010-04-04, 06:32 PM
asmaa** asmaa** غير متواجد حالياً
New Developer
 
تاريخ التسجيل: Apr 2010
المشاركات: 96
معدل تقييم المستوى: 7
asmaa** is on a distinguished road
افتراضي اسحر ولا شعوذة خش شوف نفسك جوه

اسحر ولا شعوذة خش شوف نفسك جوه
اسحر ولا شعوذة خش شوف نفسك جوه ايه رأيكم فى المراية؟ بتورينا شكلنا وبعض الاخطاء فى طريقة لبسنا وغيرها وغيرها.. طب ايه رأيكم تيجى نعمل مراية داخليه يعنى بدل ماتورينا المظهر تورينا الجوهر.. والله فكرة بس ازاى؟؟
صلوا على النبى عليه الصلاة والسلام اولا قوم جيب كشكول.. ليه ياعم انت هاتدينا درس؟ قوم هات كشكول بجد لانك هاترسم نفسك دلوقت .. فى الكشكول ده هاتصنف معارفك كلهم اللى حبيبك واللى مش طايقه واللى بتستخفه واللى تقيل على قلبك واللى انت حاسس انه طيب.. خلاص صنفت.. اقلب الورقة واكتب مواهبك ولازم يكون عندك حتى لو انت موهوب فى الغتاتة اكتبها واكتب هواياتك ولازم يكون عندك واكتب عملك ولازم يكون ماعندكش لو انت من مصر واكتب ابداعاتك حتى لو انتى عملتى محشى بالمربة اكتبيه واكتب اللى انت بتفكر فيه دايما ونفسك توصله واكتب اللى انت نفسك تهرب منه ولاحظ ان اللى انت بتكتبه ده متغير يوميا ولازم الكشكول ده ماحدش يشوفه خالص الا انت لان ممكن يقع فى ايد اللى انت كاتبه فى البلاك ليست وساعتها هاتبقى مجزرة وترجع تدعى عليا وعلى بورسعيد كلها .. المهم بعد الكلام ده كله هاتشوف نفسك فى المراية الداخلية صناعة ابو العربى
made in port said by abo elaraby طب ياعم الحج متشكرين
ايه وجه الاستفادة من المراية؟ المراية هى اللى هاتطلع العبقرى اللى جواك اذا كان جواك عبقرى
بس نفهم الاول يعنى ايه عبقرى؟؟
وبعدين نشوف هل انت عبقرى؟؟
وازاى تستفيد من عبقريتك اذا كنت عبقرى؟؟
وهاتعمل ايه لو انت مش عبقرى؟؟
يعنى ايه عبقرى.. يعنى شخص غير الاشخاص العاديين يعنى بيخترع وبيطور وبيفهم فى حاجات كتير طب وهو عشان يوصل للكلام ايه عدته اللى بيستعملها ؟

اولا الوقت:رغم ان العبقرى وقته زى وقتك يعنى ساعته من ام ستين دقيقة برده لكن هو مسخر وقته لخدمته وانت وقتك بتضيعه وبيضيعك لانك بتضيعه فيما لايفيد و بيضيعك لانك هاتسأل عنه يوم القيامة لانه بتستخدمه فى غير العمل والهواية والدراسة الاكاديمية او العملية والعبادة طبعا اساسية.

ثانيا الاهتمامات: طبعا ماحدش مننا مخه فاضى وماعندوش اهتمامات يعنى انتى بتفكرى ازاى اخلى بيبو يفرقع جيجى وانت بتفكر ازاى تبقى انت برنس الحوارات وبتشتغل الدنيا كلها والعبقرى بيفكر ازاى يطور الكرة الارضية او ازاى يعمل شىء يبهر العالم كله بيه.

ثالثا الارادة: فيه ناس بتقول انا لما اعوز حاجة باعملها وناس تانية تقول انا عمرى ماهاتقدم لانى فاشل لكن الكل بيقول ان اللى بيصمم على شىء بيعمله وطبعا هى دى الارادة لكن ازاى تصمم على الشىء اصلا؟

رابعا التشجيع: العبقرى مش بيستنى حد يشجعه ويقوله انت عبقرى واعرف دايما ان الفاشل هو اللى بيفشل مرة ومايجربش تانى لكن الناجح بيفشل كتير وطبعا لازم يسمع كلمة(انت فاشل)من كل الناس وبمجرد مايسمع الكلمة دى بيعرف انه بدأ طريق النجاح وطبعا كلنا عارفين ان أينشتاين كان فاشل في بداية مشواره في المدرسة حتى كاد أن يقتنع أهله أنه ولد معاق و زى اديسون اللى اخترعلك اللمبة اللى انت منورها دلوقت..لكن طبعا انت لما تسمع الكلمة دى بتتحطم نفسيا وخلاص بتصدق انك فاشل والهم يركبك وتروح تشرب بانجو والعياذ بالله.

يبقى دلوقتى انت عندك عدة زيك زى عمك عبقرينو الوقت والاهتمامات والارادة ولاتنتظر التشجيع من أحد
..طبعا كلنا عارفين الوقت لكن بعضنا مش فاهم ازاى اقسم الوقت والاهم هو الالتزام بالتقسيم اللى انا عملته
يعنى كام ساعة نوم وكام عمل وكام هواية وكام ابتكار لانك من النهاردة لازم تحط الابتكار قدام عينك لانك من النهاردة هاتبدأ طريقك الى العبقرية .. كلام كبير اوى.. بس صدقنى هاتلاقى الحياة ممتعة جدا هاتشوف الناس بشكل تانى ومهما كان الهدف بعيد انت معاك الزاد(متعة الرحلة+التشويق) وابقى اعمل سندوتشات يمكن الرحلة تطول ولا حاجة .
طب انا معايا العدة ازاى استعملها؟ يعنى مثلا لازم احسب الوقت بالدقيقة والثانيه؟ فى الاول مش شرط لكن على الاقل تحسبه باليوم يعنى المفروض تبقى حياتك العملية كلها متقسمة على الابتكار والابداع والاختراع واى حاجة فى اخرها اع الا القاع طبعا..الابتكار والاختراع والابداع مش قصدى بيهم تقسيم الذرة ولا خواص النيتروجين لكن ممكن فكرة جديدة انت شايفها هايفه يكون فيها ابداع مع التطويراو ابتكار اسلوب جديد توصل للاختراع لكن قبل كل ده حالتك النفسية لازم تكون بخير وان شاء الله لما تقسم وقتك هاتحس بالتغيير الجذرى فى حياتك وحالتك النفسية أكيد هاتبقى كويسة لان التغيير لازم يعدل المزاج ولو لفترة بسيطة تبدأ فيها رحلتك الى عبقرينو بس لازم تفهم حاجة تايهة عن ناس كتير انت ممكن تلاقى واحد مقسم يومه 8 ساعات نوم و12 شغل و4 مواصلات وعندك جنب تانى اللى هو الترفيه او الهواية دى عمالة تتشحن وتتنفخ لغاية ماتنفجر وطبعا انتم عارفين النتيجة..يعنى سلاح ذو حدين ياتفجرها فى ابداعك ويظهر عبقرينو ياتنفجر فيك وتبقى زى ماكنت قبل ما تقرأ الموضوع ده.
والاهتمامات طبعا لازم ترتقى يعنى احسب أى حاجة شاغلة دماغك يعنى اكتب يافطة على دماغك ممنوع دخول التفاهات يعنى لازم يكون دايما تفكيرك فى حاجات هاتوديك لنتيجة تفيدك ..يعنى افكر فى السياسة والاقتصاد وعالم الجيولوجيا؟ مش شرط لكن المهم مايبقاش كل همك فى النغمات والاغانى الجديدة والنميمة..ولاتعمل من اجل المال بل دع المال يعمل من اجلك وتذكر قول المولى عز وجل (لو فر بن ادم من رزقه كما يفر من الموت لادركه رزقه كما يدركه الموت).
الارادة بقى عايزه موضوعين تلاتة عشان نتكلم عنها لكن انا هاقولكم الفايدة ..الارادة فى مراية ابو العربى زى العضلات ممكن تبقى قوية عند ناس وضعيفة عند ناس تانية..طبعا اللى ارادته قوية ده ماحدش يقدر يكلمه من الشلة اللى هما الفشل والاكتئاب واليأس لانه أقوى منهم ..لكن اللى ارادته ضعيفه يعمل ايه؟ يروح الجيم طبعا ..وعشان تروح الجيم يلزمك قرار حاسم لان الشلة هاتفضل تكسر مقاديفك لانهم مش عايزينك تبقى اقوى منهم والقرار ده اقوى من رفع الاثقال فى الجيم(الارادة)..يعنى من الاخر لازم تقعد مع نفسك دلوقتى حالا وتقول انا عايز اتغير ولا لاء؟؟ انا عايز ابقى حاجة ولا ايه؟؟ لو اجابتك لاء اقفل الموضوع ... ايه ماقفلتش ليه؟ عايز تتغير؟ يبقى تسمع كلام اخوك الصغير ابو العربى مش عشان هو احسن منك لكن عشان كان اضعف واحد فى الشلة لحد ماجه اليوم اللى يقول فيه:-من النهاردة مافيش شلة ..انا الشلة..عقبالك

هل انت عبقرى؟ اللى هايرد يقول لاء واللى هاتقول انا عبقرية جدا من غير ماتعرف مقاييس العبقرية..
جاوب على الاسئلة دى وهاتعرف انت عبقرى ولا لاء؟
لما بتقوم بعمل معين بتتمنى انه يطلع الافضل ولا المقبول ولا ..عك وليس كله كويس؟
لما بتيجى تقلد حاجة معينه وتكتشف فيها خطأ بتعدله ولا بتقلدها بالخطأ بتاعها..ولا مش بتحب تقلد اصل؟ا
بتحب تبدأ من حيث انتهى الاخرون ولا اللى بيعملوه بتعمله ولا مالكش دعوه بحد؟
لما بتستعمل اى آله (الكترونية مثلا) بتحب تفهم مكوناتها ولا لازم تفهم مكوناتها ولا مش بتهتم ..ولا تكونش مابتستعملش التكنولوجيا اصلا؟
لو انت شغال فى مجال وسمعت عن مجال تانى افضل تحب تتعلمه من باب العلم بالشىء ولا تتعلمه عشان تغير مجالك .. ولا تتمسك بمجالك ولا تسمع لاحد؟
طبعا باجابتك على الاسئلة دى هاتقدر تحدد اذا كنت عبقرى ولا لاء بس خلى بالك ممكن تكون عبقرى لكن ناقصك بعض العدة زى الارادة مثلا او بتستخدمها غلط .
ازاى تستفيد من عبقريتك اذا كنت عبقرى؟ طبعا اول حاجة جت فى بالك ..هو العبقرى محتاج حد يوجهه؟
طبعا العبقرى محتاج الى توجيه لان هنا كلامنا عن العبقرى اللى بيتقاله يافاشل وبيكون فى معظم الاحيان لسه ماتوجهش الى طريق محدد او بمعنى اصح العبقرية المدفونة وطبعا لو كنت عبقرى دع خيالك يذهب بك الى ابعد الافاق ولا تلجمه يعنى لازم تستفيد من عبقريتك اولا فى الحاجات الصغيرة لحد ماتبقى كبيرة .. ودايما هوايتك هى سلاحك حاول تركز فيها وتبدع وتطلعلنا حاجة جديدة وطول مانت مع الله ربنا معاك.. ولما تتغير ان شاء الله ويظهر العبقرى اللى جواك هات كشكول تانى واستخدم مراية ابو العربى اللى فوق وان شاء الله هاتشوف التغيير.. وحاول تستفيد من تجارب كل الشخصيات اللى فى الكشكول حتى لو كانوا فى البلاك ليست
ولو انت مش عبقرى ممكن تبقى ناجح برده زى الصينيين لان النجاح مش محتاج لعبقرية ولا مصباح علاء الدين النجاح سهل لكن البداية ممكن تكون صعبة شوية لكن ان شاء الله هانبدأ قريبا.... هذه بعض خواطر تأتى على بالى فأترجمها لكم لكنى اعتذر لكم لان ترجمتى ضعيفة الى حد ما لكن انا باحضر لكم موضوع ان شاء الله هايكون نقلة تاريخية فى حياتنا كلنا ودعواتكم لاخوكم

رد مع اقتباس
إضافة رد

مواقع النشر (المفضلة)

الكلمات الدلالية (Tags)
اسحر, يس, جوه, شعوذة, شوف, ولا, نفسك


الذين يشاهدون محتوى الموضوع الآن : 1 ( المطورين 0 والزوار 1)
 
أدوات الموضوع
انواع عرض الموضوع

تعليمات المشاركة
لا تستطيع إضافة مواضيع جديدة
لا تستطيع الرد على المواضيع
لا تستطيع إرفاق ملفات
لا تستطيع تعديل مشاركاتك

BB code is متاحة
كود [IMG] متاحة
كود HTML معطلة

الانتقال السريع

المواضيع المتشابهه
الموضوع كاتب الموضوع المنتدى مشاركات آخر مشاركة
لا تبخل على نفسك بقصراً فى الجنه MIDO-EGYPT القسم الأسلامي 3 2011-08-17 08:42 AM
كيف تحمي نفسك من حرب محركات البحث ضد مواقع الإنترنت و الثغرات الأمنية Masry تقنيه محركات البحث - Searsh Engine Optimization 1 2010-03-11 09:07 AM
احترم نفسك صدفه الـقـسـم الـعـام 0 2010-01-15 11:15 PM
أعطى نفسك القليل من الراحه صدفه القسم الأسلامي 0 2010-01-12 10:54 PM
كود رشح نفسك للإشراف [BBcode] Link Dot Net قسم تطوير منتديات 3.6.0 | 3.7.0 | 3.8.0 0 2009-08-25 01:57 PM


الساعة الآن 02:20 AM


RSS Feeds احدث مواضيع المنتدى

Powered by vBulletin® Version 3.8.7
Copyright ©2000 - 2016, vBulletin Solutions, Inc.